16 de Novembro de 2013

 

O Celta Baloncesto segue con paso firme na Liga Feminina 2. Esta tarde, derrotou no Polideportivo Universitario de Oviedo ao Universidad de Oviedo por 57 a 63. Non foi unha vitoria fácil.

 

A igualdade foi a  tónica predominante do encontro, especialmente na primeira parte. As de Manu Martín vencían por 5 puntos ao final do primeiro cuarto (15-20), e marcharon ao descanso dominando o marcador por 32 a 38.

 

Á volta do intermedio, no terceiro período, mercé a unha gran defensa as celestes deixaron en tan só 7 puntos ás rivais, e acadaban unha diferenza favorable de +13 (39-52). O Universidad de Oviedo lanzouse polo partido no derradeiro cuarto e, aínda que conseguiron rebaixar a desvantaxe en 7 puntos, encontraron en todo momento o muro do Celta Baloncesto, que non lles deu a opción de acadar a vitoria.

 

Ao final, 57-63 para as galegas, entre as que destacaron Cristina Loureiro Currás (17 puntos, 2 rebotes, 3 asistencias e 15 de valoración) e María Pérez Araújo (14 puntos, 7 rebotes, 1 recuperación e 13 de valoración).