9 de Decembro de 2013

 

A OK Liga non para. Os dous conxuntos galegos, HC Liceo e CP Cerceda, deben superar a resaca do derbi do sábado para se centraren nos seus compromisos de mañá.

 

Ás 21:00 horas recibirá o Liceo en Riazor ao Noia Freixenet. Se ben os cataláns non chegan no seu mellor momento, sétimos na clasificación, trátase dun encontro deses que son marcador en vermello no calendario da liga. Ante o conxunto da capital do cava os coruñeses, cuartos na clasificación, procurarán escalar de novo postos na táboa e reducir distancias co líder.

 

O mesmo día á mesma hora, o CP Cerceda viaxará a terras catalás para se enfrontar ao CE Vendrell, conxunto que ocupa o segundo posto na clasificación da OK Liga. No entanto, esta circunstancia non intimidará aos de Juan Copa, que chegan coa moral polas nubes despois de derrotar aos de Carlos Gil no derbi do pasado día 7.