9 de Novembro de 2013

 

Caeu esta tarde o CBF Pabellón Ourense no Pabellón de Deportes San Esteban ante o Aros León.

 

O encontro prometía igualdade, e nese sentido non defraudou. No primeiro cuarto, as locais souberon frear ás ourensás, que acabaron o primeiro acto cunha desvantaxe de 7 puntos (20 a 13), a cal se viu ampliada no segundo cuarto, que rematou con marcador de 37 a 26 para as leonesas.

 

Mais a distancia non era insalvable, e as xogadoras do CBF Pabellón Ourense puxeron todo da súa parte no terceiro cuarto para se achegaren no marcador e, de feito, chegaron a reducir ao final deste tempo a diferenza a 6 puntos (48-42). Non obstante, por causa dun igualado derradeiro cuarto, o Aros León mantivo a vantaxe e levou o encontro por 63 a 57. Caía o CBF Pabellón Ourense malia o gran partido de Claudia Aponte (22 puntos, 2 rebotes, 3 asistencias e 20 de valoración) e Arantxa Mallou (14 puntos, 8 rebotes, 3 asistencias e 20 de valoración).