30 de Novembro de 2013

 

O Universitario de Ferrol non quere perder a estela do liderado. Na xornada de hoxe, o conxunto galego derrotou en Badaxoz ao Café Barco GBP, e mantén o empate no alto da táboa co Ensino e co Al-Qáceres.

 

O Universitario de Ferrol realizou unha gran defensa no primeiro cuarto, que lle permitiu deixar ás súas rivais en tan só once puntos (11 a 19).  No segundo período, as ferrolás mantiveron a defensa, mais perderon efectividade ofensiva. Aínda así, marcharon ao descanso por riba da barreira psicolóxica dos 10, pois obtiñan unha vantaxe de 11 puntos (23 a 34).

 

No segundo tempo, as galegas ratificaron o seu dominio do encontro e, ao final do terceiro período, gañaban por 40 a 57. O Café Barco GBP quixo reaccionar no cuarto definitivo, mais só puido reducir a desvantaxe a 12 puntos (58 a 70).

 

A barcelonesa Cristina Pedrals, do Universitario de Ferrol, foi a máxima anotadora do encontro, con 25 puntos. Porén, a mellor valoración recaería na súa compañeira Ashley Arlen, autora de 14 puntos, 19 rebotes, 3 asistencias e 1 recuperación (28 puntos de valoración).