3 de Decembro de 2013

 

Segundo avanza a axencia de noticias Reuters, un fiscal de São Paulo estaría a investigar á FIFA e mais á empresa encargada da organización do evento do sorteo de grupos de Brasil 2014, GEO Eventos, por posible discriminación racial.

 

O problema xira en torna á elección dos presentadores da gala do sorteo, a cal terá lugar este venres. A organización optou pola modelo Fernanda Lima e polo seu marido, o presentador de televisión Rodrigo Hilbert. Ambos os elixidos son de raza branca. Porén, segundo a revista Veja a canle televisiva TV Globo propuxera outros dous candidatos, os intérpretes de telenovelas Camila Pitanga (de pel mulata) e Lázaro Ramos (de raza negra), polo que a elección do matrimonio Lima-Hilbert (que xa foran a parella presentadora do logo de Brasil 2014) suporía, de ser certa a información apuntada por Veja, un caso de discriminación racial. Para o fiscal Christiano Jorge dos Santos existirían indicios de que a causa de raza motivase o dito cambio, xa que dous presentadores brancos non representan a diversidade racial do Brasil.