7 de Decembro de 2013

 

Un gol do vigués Santi Mina no minuto 70 outorgoulle ao Celta un valioso triunfo en Balaídos, no partido de ida dos dezaseisavos de final da Copa do Rei ante o Athletic de Bilbao.

 

Nos primeiros minutos os visitantes dispuxeron das mellores ocasións. No minuto 11, Muniain remataba contra a portería celesta, mais o seu lanzamento saíu desviado. No 19, o mesmo xogador dos leóns forzaba a intervención do meta celeste, hoxe Sergio Álvarez. No 24 os visitantes volvían avisar por mediación dun disparo desviado de Iker Muniain, e no 26 achamos a resposta céltica nun disparo de Orellana. Os celestes comezaban a sacudir a presión, e no 29 Álex López provocaba a intervención do porteiro Iago Herrerín. San José e Iturraspe polo Athletic e Santi Mina polo Celta ben puideron, coas súas ocasións, abrir o marcador, mais ao descanso chegou con empate a 0.

 

Ao comezo da segunda metade, o encontro volveu trabado, con sucesión de faltas cometidas por xogadores de ambos os conxuntos. No minuto 54 avisaba Nolito e, no 59, respondía Muniain. No 64, Herrerín botaba a perder un remate de Santi Mina. O vigués estaba a procurar o tanto desde a primeira parte, e no minuto 70 achou o premio ao seu esforzo.

 

Tras o tanto local, os leóns apertaron en busca do empate, de modo que Sergio Álvarez tivo que responder a dous remates de Ibai Gómez e de Aduriz. Con todo, o marcador non sufriu alteracións. O Celta consegue vantaxe para o encontro de volta.