9 de Decembro de 2013

 

Como na mítica final do Ellis Park de Johannesburgo de 1995, Springboks e All Blacks volveron encontrarse en Sudáfrica no encontro decisivo por un título mundial. Desta vez, estaba en xogo a World Series de Rugby de sevens. O lugar, o Estadio Nelson Mandela Bay.

 

A situación do partido era propicia nun principio para Nova Celandia, que se adiantou no marcador mercé a un ensaio de Scott Curry (0 a 7). Posteriormente, un novo ensaio dos All Blacks, por mediación de Sherwin Stowers, deixaría o marcador en 0 a 14.

 

No entanto, os sudafricanos tiraron de orgullo ante os seus. Branco du Preez anotaba dous ensaios (aínda que non convertería o segundo), e deixaba o marcador ao descanso en 12 a 14. Na segunda metade, un ensaio de Kyle Brown, capitán dos Springboks, dáballe o título aos locais.

 

Por outra parte, no encontro polo terceiro e cuarto posto, Samoa derrotou a Arxentina por un contundente 21 a 7. A “Final Plate”, pola súa parte, foi parar ás mans de Fidxi, que venceu a Francia por 45 a 19.