27 de Novembro de 2013

 

Onte, o xornal dixital Diário Liberdade publicaba a crónica da segunda xornada da Liga Gallaecia de fútbol gaélico, a cal tivo lugar esta fin de semana en Manzaneda de Trives, no marco do festival A Rebusca de Outono.

 

Nin a neve nin o frío impediron a celebración desta xornada de liga, na cal debutaba na competición o conxunto vigués do Ambilokwoi. Precisamente sería este equipo o que, xunto co Suévia de Santiago de Compostela, disputaría o primeiro encontro. No medio dunhas condicións climáticas adversas, os debutantes lograron un máis que meritorio empate ante o líder, pois o resultado final foi Suévia 2-2 (8) Ambilokwoi 1-5 (8).

 

O outro encontro a xogar, que enfrontaría ao Cascarilha da Coruña e ao Afiadoras de Ourense, non puido disputarse debido á ausencia do conxunto coruñés, cuxos integrantes foron incapaces por motivos loxísticos de se desprazaren cara ao lugar do encontro. Dada esta circunstancia, a escuadra herculina tivo que dar o partido por perdido, de modo que o Afiadoras FG sumou os dous puntos da vitoria.

 

Así as cousas, o Suévia fica líder en solitario da Liga Gallaecia. Velaquí a clasificación:

 

1ª  Suévia de Compostela (3 puntos)
2ª  Torques de Lugoslávia (2 puntos, cun partido menos)
3ª Afiadoras de Ourense –(2 puntos)
4ª Ambilokwoi de Vigo (1 punto, cun partido menos)
5ª Cascarilha (0 puntos)